मुर्तीजापुरात नो हॉकर्स झोनचे बोर्ड लावले, पण अतिक्रमण तसाच — नागरिकांमध्ये संभ्रम आणि चर्चा

मुर्तीजापुर (दि.२३ जुलै २५) –शहरातील मध्यवर्ती भागात मुर्तीजापुर नगरपरिषदेने “नो हॉकर्स झोन – ना फेरीवाला क्षेत्र” अशी स्पष्ट सूचना देणारे बोर्ड आज लावले. मात्र, या बोर्डांच्या अवघ्या काही फुटांवरच अतिक्रमणधारक फेरीवाले पुन्हा नेहमीप्रमाणे आपली दुकाने लावून बसल्याचे पाहायला मिळाले. त्यामुळे या उपक्रमाची गंभीरता व अंमलबजावणीबाबत शहरात उलटसुलट चर्चा रंगल्या आहेत.

शहरवासीय विचारत आहेत की:

हे बोर्ड केवळ औपचारिकता म्हणून लावण्यात आले आहेत का?

खरेच अतिक्रमणमुक्तीची मोहीम राबवली जाणार आहे का?

नगरपरिषद अतिक्रमणधारक फेरीवाल्यांना पर्यायी जागा म्हणून हॉकर्स झोन उपलब्ध करून देणार आहे का?

की पुन्हा काही दिवसांनी हेच अतिक्रमणधारक बोर्ड हटवून परत त्याच ठिकाणी व्यवसाय सुरू करतील?

सध्या कोणत्याही अतिक्रमणधारकाला नगरपरिषदेकडून अधिकृत जागा, पर्यायी व्यवसाय क्षेत्र, किंवा हॉकर्स झोन संदर्भात कोणतीही माहिती किंवा लेखी सूचना मिळालेली नाही. परिणामी, फेरीवाल्यांमध्ये असुरक्षितता आहे आणि नागरिकांमध्ये संभ्रमाची स्थिती निर्माण झाली आहे.

पहिल्याच दिवशी नियमाचे उल्लंघन झाल्यामुळे हे बोर्ड शहरात ‘दाखवण्यासाठीचा दिखावा’ असल्याची टीका नागरिक करत आहेत.

काहींनी विचारले आहे की जर अंमलबजावणीच करायची नसेल, तर ही मोहीम आरंभ का करण्यात आली?

नगरपरिषदने पुढील गोष्टी स्पष्ट करणे आवश्यक आहे:

1. नो हॉकर्स झोन क्षेत्राची अचूक व्याप्ती व नियम काय?

2. फेरीवाल्यांसाठी पर्यायी जागेची व्यवस्था आहे का?

3. कारवाईचे वेळापत्रक आणि पद्धती काय असणार?

शहरात कायद्याचे पालन व्हावे आणि सर्व घटकांना न्याय मिळावा यासाठी ही स्पष्टता आवश्यक आहे. अन्यथा हा निर्णय केवळ कागदोपत्री मर्यादित राहील, अशी प्रतिक्रिया जागरूक नागरिकांनी दिली आहे.