हायवे ओलांडताना अचानक कारसमोर आला बालक; अपघातात ११ वर्षीय रौनकचा मृत्यू

मूर्तीजापूर : अमरावतीहून मूर्तीजापूरकडे येत असताना कोहिनूर बारसमोर हायवेवर रस्ता ओलांडणाऱ्या ११ वर्षीय सैय्यद रौनक सैय्यद अल्ताफ मदारी याला मारुती स्विफ्ट कारची धडक बसल्याने त्याचा दुर्दैवी मृत्यू झाल्याची घटना गुरुवारी घडली. या घटनेमुळे परिसरात हळहळ व्यक्त होत आहे.

मृत बालकाचे नाव सैय्यद रौनक सैय्यद अल्ताफ मदारी, रा. नवीन घरकुल, मूर्तीजापूर असे आहे.मिळालेल्या प्राथमिक माहितीनुसार, मारुती स्विफ्ट क्रमांक MH 30 BW 1866 ही कार अमरावतीकडून मूर्तीजापूरकडे येत होती. त्याचवेळी सैय्यद रौनक हा हायवेवर रस्ता ओलांडत असताना तो अचानक वाहनासमोर आल्याने स्विफ्टची त्याला धडक बसली अशी प्राथमिक माहिती समोर येत आहे.

या अपघातात रौनक गंभीर जखमी झाला.अपघातानंतर स्थानिक नागरिकांच्या मदतीने सैय्यद रौनक याला तातडीने रुग्णालयात दाखल करण्यात आले. मात्र, डॉक्टरांनी तपासणी केल्यानंतर त्याला मृत घोषित केले.अपघातग्रस्त स्विफ्ट वाहनाच्या मालकाने पोलिसांना घटनेची माहिती दिल्याचे सांगण्यात येत आहे.

प्राथमिक माहितीनुसार वाहन चालविणाऱ्या व्यक्तीचे नाव डॉ. भोरे रा. मूर्तीजापूर असल्याचे सांगितले जात आहे.

दरम्यान, अपघात नेमका कसा घडला, वाहनाचा वेग किती होता तसेच चालकाची भूमिका याबाबत पोलिसांकडून तपास सुरू आहे. अधिकृत तपासानंतरच अपघाताची नेमकी परिस्थिती स्पष्ट होणार आहे.