मूर्तिजापूर: नदीत वाहून गेलेल्या महिलेचा मृतदेह तीन दिवसांनी सापडला; बचाव पथकांचा आमदार हरिष पिंपळे यांच्या हस्ते सत्कार

मूर्तिजापूर (तालुका प्रतिनिधी) : मूर्तिजापूर तालुक्यातील कंझरा येथे कमळगंगा नदीत वाहून गेलेल्या शेतमजूर महिला रेखाताई मते (वय ३६) यांचा मृतदेह तीन दिवसांच्या अथक शोधकार्यानंतर अखेर सापडला आहे.

२८ ऑगस्ट २०२५ रोजी घडलेल्या या दुर्दैवी घटनेनंतर, मृतदेह शोधण्यासाठी विविध आपत्कालीन शोध व बचाव पथकांनी तीन दिवस शर्थीचे प्रयत्न केले.

या शोधकार्यात वीर भगतसिंग आपत्कालीन शोध व बचाव पथक (कुरणखेड), मॉं चंडीका आपत्कालीन शोध व बचाव पथक (कुरणखेड), आणि संत गाडगेबाबा आपत्कालीन शोध व बचाव पथक (पिंजर) यांनी मोलाची कामगिरी बजावली. त्यांच्या अविश्रांत परिश्रमांनंतर, ३१ ऑगस्ट रोजी दुपारी ३ वाजता घटनास्थळापासून दोन किलोमीटर पुढे महिलेचा मृतदेह आढळला.

या पथकांनी दाखवलेली निस्वार्थ सेवा आणि समर्पण कौतुकास्पद आहे.

या बचाव पथकांच्या धाडसी कार्याची दखल घेत, आमदार हरिष पिंपळे यांनी त्यांचा विशेष सत्कार केला. यावेळी त्यांनी बचाव पथकांचे विशेष आभार मानले आणि त्यांच्या जनसेवेच्या कार्याला सलाम केला.

जनतेसाठी सदैव त्यांच्या पाठीशी उभे राहण्याची ग्वाहीही आमदार पिंपळे यांनी दिली. त्यांच्या कार्यामुळे मते कुटुंबाचे दुःख काही अंशी कमी होण्यास मदत झाली.

रेखाताई मते यांच्या निधनाने मते परिवारावर शोककळा पसरली असून, श्री गजानन महाराज बहुउद्देशीय संस्था (मूर्तिजापूर), पिंपळे परिवार (मूर्तिजापूर), आणि समस्त भाजपा परिवार शहर व ग्रामीण (मूर्तिजापूर) यांनी या दुःखात सहभागी होत कुटुंबियांचे सांत्वन केले आहे.