अमरावतीत अमली पदार्थांचे जाळे उघड ; गुन्हे शाखेची मोठी कारवाई : अमरावतीत 3 कोटींचा साठा जप्त, 2.80 किलो मेफेड्रोनसह दोघे अटकेत

अमरावती | दिनांक : ०८ |
अमरावती शहरात अमली पदार्थांच्या वाढत्या अवैध व्यापारावर मोठा आळा घालत शहर गुन्हे शाखेने धडक कारवाई करत तब्बल 3 कोटी रुपयांचे एमडी (मेफेड्रोन) ड्रग्स जप्त केले आहे. या प्रकरणी पोलिसांनी दोन संशयित आरोपींना अटक केली असून या प्रकरणाचा सखोल तपास सुरू आहे. या कारवाईमुळे अमरावती शहरात मोठी खळबळ उडाली आहे.

पोलिसांकडून मिळालेल्या माहितीनुसार, शनिवार 8 मार्च 2026 रोजी सायंकाळी सुमारे 6.15 वाजण्याच्या सुमारास अमरावती शहर गुन्हे शाखेला नागपुरी गेट पोलीस स्टेशन हद्दीत अमली पदार्थांची देवाणघेवाण होणार असल्याची गोपनीय माहिती मिळाली होती. या माहितीच्या आधारे गुन्हे शाखेच्या पथकाने तात्काळ हालचाल करत लाल खडी ते सुकळी वनारसी रोड परिसरात सापळा रचला.

काही वेळ निरीक्षण केल्यानंतर पोलिसांनी संशयास्पद हालचाली करणाऱ्या दोन तरुणांना ताब्यात घेतले. त्यांची चौकशी व झडती घेतली असता त्यांच्या ताब्यातून 2 किलो 80 ग्रॅम एमडी (मेफेड्रोन) हा अत्यंत घातक अमली पदार्थ आढळून आला. या जप्त अमली पदार्थाची बाजारातील अंदाजे किंमत सुमारे 3 कोटी 1 लाख 20 हजार रुपये इतकी असल्याची माहिती पोलिसांनी दिली आहे.

या कारवाईदरम्यान पोलिसांनी
अब्दुल फहीम अब्दुल (वय 25, रा. आझाद नगर, अमरावती)
शेख आयान शेख रमजान (वय 20, रा. द्वारका नगर, अमरावती)
या दोघांना ताब्यात घेतले असून त्यांच्याविरुद्ध अमली पदार्थ प्रतिबंधक कायद्यानुसार (NDPS Act) गुन्हा दाखल करण्याची प्रक्रिया सुरू आहे.

विशेष म्हणजे, जप्त करण्यात आलेले एमडी (मेफेड्रोन) हे अत्यंत महागडे आणि घातक सिंथेटिक ड्रग्स मानले जाते. शहरांमध्ये विशेषतः तरुणांमध्ये या ड्रग्सचे प्रमाण वाढत असल्याने पोलीस आणि अंमली पदार्थ नियंत्रण यंत्रणा यावर सातत्याने कारवाई करत आहेत.

ही कारवाई पोलीस निरीक्षक संदीप चव्हाण यांच्या नेतृत्वाखाली अमरावती शहर गुन्हे शाखेच्या पथकाने केली. पोलिसांनी आरोपींकडून मिळालेल्या माहितीच्या आधारे या ड्रग्सचा पुरवठा नेमका कुठून होत होता, यामागे कोणते मोठे रॅकेट कार्यरत आहे का, तसेच या साखळीत आणखी कोणाचा सहभाग आहे का, याचा तपास सुरू केला आहे.
पोलिस सूत्रांच्या माहितीनुसार, अमरावती शहरात आणि आसपासच्या भागात अलीकडच्या काळात अमली पदार्थांच्या व्यवहारात वाढ होत असल्याची शक्यता वर्तवली जात आहे. त्यामुळे या कारवाईला ड्रग्स तस्करीविरोधातील महत्त्वाचा धक्का मानले जात आहे.

दरम्यान, पोलिसांकडून या प्रकरणाचा तपास वेगाने सुरू असून या प्रकरणात आणखी काही संशयित आरोपींचा शोध घेण्याचे काम सुरू असल्याची माहिती मिळत आहे.

अमरावती शहरात एवढ्या मोठ्या प्रमाणात एमडी ड्रग्स जप्त झाल्याने अमली पदार्थांच्या वाढत्या साखळीबाबत गंभीर प्रश्न निर्माण झाले आहेत. गुन्हे शाखेच्या या कारवाईमुळे ड्रग्स तस्करांना मोठा धक्का बसला असून शहरात अमली पदार्थांविरोधात कठोर कारवाई सुरूच राहणार असल्याचे संकेत पोलिसांकडून देण्यात आले आहेत.