देशमुख कुटुंबियांनी घेतली ॲड. प्रकाश आंबेडकर यांची भेट

दिनांक २१:अकोला: मस्साजोग येथील सरपंच स्व. संतोष देशमुख यांच्या कुटुंबीयांनी सोमवारी यशवंत भवन येथे वंचित बहुजन आघाडीचे नेते अॅड. प्रकाश आंबेडकर यांची भेट घेतली. देशमुख कुटुंबीयांनी संतोष देशमुख यांच्या हत्येविषयी माहिती दिली. तसेच या खटल्यात न्याय कसा मिळेल, या अनुषंगाने चर्चा झाली.भेटीनंतर धनंजय देशमुख यांनी माध्यमांशी संवाद साधला. अॅड. आंबेडकर यांना आम्ही घटनाक्रम सांगितला असून, न्याय कसा मिळेल, याबाबतही चर्चा झाली.

त्यांनीही माहिती जाणून घेतली. आमच्या कुटुंबावर मोठा आघात झाला असून, यातून कसे सावरण्यासाठी त्यांनी आस्थेने चौकशी केली. घटना घडल्यानंतरही अॅड. आंबेडकर यांनी फोनवरून सांत्वन केले होते. त्यावेळी त्यांची प्रकृती बरी नसल्याने त्यांनी फोनरून संवाद साधला होता. आज झालेली भेट ही कौटुंबीक सारखी होती. आरोपींना शिक्षा कशी होईल, याच – अनुषंगाने सर्वाधिक वेळ चर्चा झाली, – असेही धनंजय देशमुख म्हणाले. यावेळी वैभवी, भाऊ व देशमुख कुटुंबातील अन्य सदस्यही होते.