सहाय्यक निबंधक कार्यालयातील अनुपस्थितीमुळे नागरिक त्रस्त; कामकाज ठप्प

मुर्तीजापूर –दिनांक ०३: सहाय्यक निबंधक सहकारी संस्था कार्यालयातील कामकाज अलीकडे ढवळून निघाल्याची नागरिकांकडून तक्रार व्यक्त करण्यात येत आहे.

कार्यालयात अधिकारी नियमितपणे उपलब्ध नसल्याने अर्ज, नोंदी व सहकारी संस्थांशी संबंधित विविध कामांसाठी येणाऱ्या नागरिकांना अनेकदा निराश होऊन परत जावे लागत आहे.

नागरिकांच्या म्हणण्यानुसार, संबंधित अधिकारी कार्यालयात केवळ काही मिनिटांसाठीच उपस्थित असतात, तर अनेक वेळा भेटही मिळत नाही. फोनद्वारे संपर्क साधण्याचाही प्रयत्न अनेक नागरिकांनी केला असता, बहुतेक वेळा प्रतिसाद मिळत नसल्याचे समजते.

काही नागरिकांनी सांगितले की, कार्यालयीन उपस्थिती अनियमित असल्याने सहकारी संस्थांच्या नोंदी, कागदपत्रांची पडताळणी, मंजुरी प्रक्रिया अशा महत्त्वाच्या कामांत विलंब होत आहे.

त्यामुळे शेतकरी, सदस्य, समाजसेवी संस्था व स्थानिक प्रतिनिधी यांचेही कामकाज अडथळ्यात येत असल्याचे चित्र आहे.

कार्यालयातील परिस्थिती लक्षात घेता, संबंधित विभागाने नियमित हजेरी, वेळापत्रक व उत्तरदायित्व याबाबत आवश्यक पावले उचलावीत, अशी मागणी नागरिकांकडून होत आहे.