फ्लायओव्हरवर अनियंत्रित होऊन भरधाव कार पलटी

अकोला : दिनांक २८ : शहरातील अशोक वाटिका चौक ते नेहरू पार्ककडे जाणाऱ्या उड्डाणपुलावर (फ्लायओव्हर) आज एक भीषण अपघात थोडक्यात टळला. लाल रंगाची मारुती सुझुकी स्विफ्ट कार (क्रमांक MH 30 BB 5317) अचानक अनियंत्रित होऊन डिव्हायडरला धडकली आणि रस्त्याच्या मध्यभागीच उलटली.

प्रत्यक्षदर्शींनी दिलेल्या माहितीनुसार, ही कार अशोक वाटिकेकडून नेहरू पार्कच्या दिशेने जात होती. फ्लायओव्हरवरील वळणावर चालकाचा वाहनावरील ताबा सुटला आणि कार रस्त्याच्या कडेला असलेल्या पिवळ्या-काळ्या रंगाच्या सुरक्षा डिव्हायडरवर आदळली. धडक इतकी जोरदार होती की कार उजव्या बाजूला पूर्णपणे पलटी झाली.

सुदैवाने या अपघातात कोणतीही जीवितहानी झाली नाही. मात्र कारचा पुढील भाग आणि डावीकडील दरवाजा मोठ्या प्रमाणात नुकसानग्रस्त झाला आहे.

फ्लायओव्हरवर वाहतूक कोंडी
उड्डाणपुलाच्या मध्यभागी कार पलटल्यामुळे काही काळ वाहतूक ठप्प झाली होती. घटनेची माहिती मिळताच पोलिस आणि मदतकार्य पथकाने घटनास्थळी दाखल होऊन कार बाजूला काढली, त्यानंतर वाहतूक सुरळीत करण्यात आली.