मतिमंद अल्पवयीन मुलीचा निर्वस्त्र मृतदेह नदीपात्रात; घातपाताचा संशय

सरकार माझा न्यूज डेस्क : दिनांक २३ :

बुलढाणा जिल्ह्यात दोन वेगवेगळ्या घटनांमुळे खळबळ उडाली आहे. मोताळा तालुक्यातील बोराखेडी येथे १७ वर्षीय गतिमंद मुलीचा मृतदेह नदीपात्रात निर्वस्त्र अवस्थेत आढळून आला, तर शेगावमध्ये लग्नाचे आमिष दाखवून तरुणीवर चार वर्षे अत्याचार केल्याप्रकरणी गुन्हा दाखल करण्यात आला आहे. दोन्ही प्रकरणांचा पोलिसांकडून तपास सुरू आहे.

बोराखेडीतील घटना नेमकी काय?

मोताळा तालुक्यातील बोराखेडी येथील १७ वर्षीय गतिमंद मुलगी गुरुवार, १९ फेब्रुवारी रोजी सकाळी सुमारे १० वाजता घरातून बाहेर पडली होती. सायंकाळपर्यंत ती परत न आल्याने कुटुंबीयांनी गावकऱ्यांच्या मदतीने शोधमोहीम सुरू केली. मात्र रात्री उशिरापर्यंत ती सापडली नाही.

शुक्रवारी, २१ फेब्रुवारी रोजी सकाळी साडेदहा वाजण्याच्या सुमारास एका स्थानिक व्यक्तीला नदीपात्रात पाण्यावर तरंगणारा मृतदेह दिसला. जवळ जाऊन पाहिल्यानंतर तो बेपत्ता मुलीचाच असल्याचे स्पष्ट झाले.

मृतदेह निर्वस्त्र अवस्थेत आढळल्याने परिसरात तणाव निर्माण झाला असून घातपाताचा संशय व्यक्त केला जात आहे.

पोलिसांची कारवाई

घटनेची माहिती मिळताच बोराखेडी पोलीस ठाण्याचे पीएसआय राजेंद्र कपले पथकासह घटनास्थळी दाखल झाले. पंचनामा करण्यात आला असून मृतदेह शवविच्छेदनासाठी बुलढाणा येथे पाठविण्यात आला आहे.

प्राथमिक तपासाबाबत अधिकृत माहिती देण्यात आलेली नसली तरी मृतदेहाची अवस्था पाहता संशयास्पद मृत्यूची शक्यता नाकारता येत नसल्याचे पोलीस सूत्रांचे म्हणणे आहे. आकस्मिक मृत्यूची नोंद करून पुढील तपास सुरू आहे.