अकोला-काचीगुडा एक्स्प्रेसच्या घोषणेला १५ वर्षे पूर्ण

दिनांक २५ : अकोला येथून सुटणारी एकमेव लांब पल्ल्याची रेल्वे

अकोला येथून सुटणारी एकमेव लांब पल्ल्याची रेल्वे असलेल्या अकोला-काचीगुडा एक्स्प्रेसच्या घोषणेला आज १५ वर्षे पूर्ण होत आहेत.

*रेल्वे अर्थसंकल्प २०१०-११ मध्ये २४ फेब्रुवारी २०१० रोजी तत्कालीन रेल्वेमंत्री ममता बॅनर्जी* यांनी या गाडीची घोषणा केली होती.

अकोला हे विभागातील सर्वाधिक महसूल देणाऱ्या स्थानकांपैकी एक असतानाही, येथे नवीन लांब पल्ल्याच्या गाड्या सुरू झालेल्या नाहीत. यामुळे लोकप्रतिनिधी आणि रेल्वे प्रशासनाच्या उदासीनतेबाबत तीव्र नाराजी व्यक्त केली जात आहे.

अकोला-पूर्णा सेक्शनचे ब्रॉडगेज रूपांतर

२००८ मध्ये अकोला-पूर्णा सेक्शनचे ब्रॉडगेज रूपांतर पूर्ण झाल्यानंतर १७६३९/१७६४० काचीगुडा-नांदेड एक्स्प्रेस ही दैनिक गाडी म्हणून अकोला पर्यंत वाढविण्यात आली. या मार्गावर अकोल्याहून सुटणारी ही पहिली व शेवटची नियमित धावणारी लांब पल्ल्याची गाडी ठरली.

गाडीच्या वेळापत्रकात बदल: नरखेड पर्यंत विस्तार

सुरुवातीला ही गाडी दररोज अकोल्या पर्यंत धावत असे. २०१५ मध्ये या गाडीचे वेळापत्रक बदलण्यात आले आणि ती आठवड्यातून सहा दिवस नागपूर-इटारसी लाइनवरील नरखेड स्टेशनपर्यंत धावू लागली, तर आठवड्यातून फक्त एक दिवस अकोल्यापर्यंत धावते. सध्या अकोला-वाशीम-हिंगोली  मार्गावर केवळ एकच दैनिक एक्स्प्रेस गाडी, दोन पॅसेंजर आणि एक डेमू सेवा उपलब्ध आहे. २०२४ ला प्रवासी संघटनेच्या मागणीला यश येऊन मुंबई छत्रपति शिवाजी महाराज टर्मिनस –  जालना जन शताब्दी एक्सप्रेस हिंगोली (डेक्कन) पर्यंत वाढवण्यात आली.

अकोला रेल्वे स्टेशन: सर्वाधिक उत्पन्न देणारे स्टेशन

अकोला हे मुंबई-हावडा आणि हैदराबाद-जयपुर क्रॉसिंगवर असलेले एक प्रमुख स्टेशन असून विभागातील सर्वाधिक उत्पन्न मिळवणाऱ्या स्टेशनपैकी एक असूनही, गेल्या पंधरा वर्षांत येथून एकही नियमित नवीन लांब पल्ल्याची गाडी सुरू करण्यात आलेली नाही. यामुळे अकोल्याच्या रेल्वे विकासाची वाटचाल ठप्प झाली आहे. स्थानिक नागरिक आणि प्रवाशांनी निवडून आलेल्या प्रतिनिधी आणि रेल्वे अधिकाऱ्यांवर प्रदेशाच्या वाढत्या वाहतूक गरजांकडे दुर्लक्ष केल्याबद्दल टीका केली आहे.

प्रवासी आणि संघटनांची मागणी

प्रवासी, व्यापारी व प्रवासी संघटनांना आशा आहे की रेल्वे त्यांच्या दीर्घकाळापासूनच्या मागण्यांकडे लक्ष देईल आणि शहराच्या वाढत्या लोकसंख्येला आणि आर्थिक महत्त्वाला अनुसरून नवीन लांब पल्ल्याच्या गाड्या सुरू करेल, तसेच सुरू असलेल्या साप्ताहिक गाड्या दैनिक कराव्यात.

अकोला-काचीगुडा एक्स्प्रेसच्या घोषणेला १५ वर्षे

अकोला-काचीगुडा एक्स्प्रेस महाराष्ट्र आणि तेलंगणातील महत्त्वाच्या ठिकाणांशी अकोल्याचा संपर्क साधणारी ही गाडी प्रवाशांसाठी जीवनरेषा ठरली असून सध्या, प्रगती आणि विकासाच्या मागण्यांमध्ये, अकोला-काचीगुडा एक्सप्रेस ही अकोल्याची एकमेव लांब पल्ल्याची गाडी म्हणून टिकून आहे.