अकोल्यात दुर्मिळ ‘अल्बिनो मण्यार’ सापडला! सर्पमित्रांनी केले कौशल्यपूर्ण रेस्क्यू

अकोला, १० जुलै २०२५:

अकोल्यात एक अत्यंत दुर्मिळ आणि आश्चर्यजनक असा अल्बिनो मण्यार (Common Krait – Albino variant) सापडल्याची घटना समोर आली आहे. सर्पमित्र सुरज इंगळे आणि अभय निंबाळकर यांनी या पांढराशुभ्र विषारी सापाला सुरक्षितरित्या पकडून नैसर्गिक अधिवासात सोडले. त्यांच्या या कार्यामुळे जैवविविधतेच्या संवर्धनाविषयी नव्याने चर्चा सुरू झाली आहे.

कुठे आणि कधी सापडला?

९ जुलै रोजी रात्री १२ वाजताच्या सुमारास, श्री. करण कराळे यांच्या घरात, श्रद्धा नगर (जाजू नगर चौक, डाबकी रोड रेल्वे गेट) येथे हा दुर्मिळ साप दिसून आला. नागरिकांनी तत्काळ सर्पमित्रांना माहिती दिली.

अल्बिनो म्हणजे काय?

‘अल्बिनो’ ही एक जैविक स्थिती असून, यामध्ये प्राण्यांच्या शरीरात मेलेनिन नावाच्या रंगद्रव्याचा अभाव असतो. त्यामुळे अशा प्राण्यांचे शरीर पूर्णपणे पांढरे किंवा फिकट दिसते, आणि डोळ्यांचा रंग गुलाबी अथवा लालसर असतो. अल्बिनो प्राणी नैसर्गिक अधिवासात फार कमी प्रमाणात आढळतात, कारण त्यांच्या रंगामुळे त्यांना सहज ओळखता येते – जे त्यांच्यासाठी धोकादायक ठरते.

सुरक्षित रेस्क्यू आणि सुटका

सर्पमित्र सुरज इंगळे, अभय निंबाळकर यांनी अत्यंत दक्षतेने व सुरक्षिततेने या अल्बिनो मण्यारला पकडले. त्यानंतर अकोला वन विभागाच्या अधिकाऱ्यांच्या उपस्थितीत, या दुर्मिळ सापाची नोंद करण्यात आली. वनविभागाचे श्री. संघपाल तायडे यांच्यासह MH30 सर्पमित्र संघटनेतील योगेश गावंडे पाटीलही उपस्थित होते. नोंदीनंतर सापाला पुन्हा जंगलातील सुरक्षित ठिकाणी सोडण्यात आले.

निसर्ग प्रेमींसाठी आनंदाची बातमी

या दुर्मिळ घटनेमुळे अकोल्याच्या जैवविविधतेकडे नव्याने लक्ष वेधले गेले आहे. नागरिकांमध्ये वन्यजीव संरक्षणाबाबत जागरूकता वाढत असून, पर्यावरण प्रेमींसाठी ही घटना एक सकारात्मक संदेश घेऊन आली आहे.

सर्पमित्र सुरज इंगळे म्हणाले:

“अल्बिनो साप फारच दुर्मीळ असतो. त्यांचं नैसर्गिक संरक्षण आवश्यक आहे, कारण त्यांच्या रंगामुळे ते लवकर शिकार होऊ शकतात. अशा सापांची माहिती वनविभागात नोंदवून त्यांना योग्य ठिकाणी सोडणे ही आपली जबाबदारी आहे.”