पिंजरमध्ये कथित जुगाराचा बाजार; तक्रारीनंतरही कारवाईचा पत्ता नाही!

पिंजर : पिंजर पोलीस स्टेशन हद्दीत सुरू असल्याचा आरोप असलेल्या कथित अवैध जुगार अड्ड्यांवर तातडीने कारवाई करावी, या मागणीसाठी मूर्तिजापूर शहरातील नगरसेवक तसवर खान यांनी उपविभागीय पोलीस अधिकारी, मूर्तिजापूर यांना जनहितार्थ स्मरणपत्र दिले आहे.यापूर्वी याच विषयावर लेखी तक्रार करण्यात आली होती.

मात्र, अद्याप कोणतीही ठोस कारवाई झालेली नसल्याचा आरोप स्मरणपत्रातून करण्यात आला आहे. त्यामुळे तक्रार आणि स्मरणपत्रानंतरही कारवाई शून्य, तर कथित जुगार अड्डे मात्र सुरूच असल्याचा दावा करण्यात आला आहे.दुष्काळाच्या परिस्थितीत ग्रामीण भागातील नागरिक आर्थिक संकटाचा सामना करत असताना अवैध जुगारामुळे नागरिकांची आर्थिक फसवणूक व कुटुंबांवर आर्थिक परिणाम होत असल्याचे स्मरणपत्रात नमूद करण्यात आले आहे.

स्मरणपत्रात पोलिस प्रशासनाशी कथित आर्थिक व्यवहार तसेच राजकीय संबंधांचा प्रभाव असल्याचे गंभीर आरोप करण्यात आले आहेत. मात्र, या आरोपांची स्वतंत्र अधिकृत पुष्टी झालेली नाही.

त्यामुळे पोलिस प्रशासनाने तक्रारीची निष्पक्ष चौकशी करून वस्तुस्थिती स्पष्ट करणे अपेक्षित आहे.कथित जुगार अड्डे तातडीने बंद करून संबंधितांवर कायदेशीर कारवाई करावी, अशी मागणी नगरसेवक तसवर खान यांनी केली आहे.

कारवाई न झाल्यास जनआंदोलन आणि आमरण उपोषणाचा इशाराही स्मरणपत्रातून देण्यात आला आहे.

सरकार माझा न्यूजचा सवाल : तक्रार आणि स्मरणपत्रानंतरही जर कथित जुगार अड्डे सुरू असल्याचा आरोप होत असेल, तर पोलिस प्रशासनाने याची प्रत्यक्ष तपासणी करून कारवाई झाली की नाही, हे स्पष्ट करणे गरजेचे आहे.