शिवण खुर्दमध्ये शहीद भगतसिंग जयंती उत्साहातशहीद भगतसिंग क्रीडांगणाचे उद्घाटन; तरुणाईला मिळाले हक्काचे क्रीडा व्यासपीठ

मुर्तिजापूर/ शिवण खुर्द : थोर क्रांतिकारक शहीद भगतसिंग यांच्या जयंतीनिमित्त शिवण खुर्द येथे विविध उपक्रमांच्या माध्यमातून जयंती उत्साहात साजरी करण्यात आली. यानिमित्त गावातील तरुण आणि खेळाडूंसाठी उभारण्यात आलेल्या ‘शहीद भगतसिंग क्रीडांगणा’चे उद्घाटन करण्यात आले.

शहीद भगतसिंग यांच्या प्रतिमेला अभिवादन करून कार्यक्रमाची सुरुवात करण्यात आली. देशाच्या स्वातंत्र्यासाठी आपल्या प्राणांची आहुती देणाऱ्या भगतसिंग यांच्या त्यागाचे स्मरण करत त्यांच्या विचारांचा वारसा पुढे नेण्याचा संकल्प यावेळी करण्यात आला.

गावात क्रीडांगण उपलब्ध झाल्यामुळे युवकांना क्रिकेट, फुटबॉल, धावणे यासह विविध क्रीडा प्रकारांच्या सरावासाठी हक्काचे व्यासपीठ मिळाले आहे. ग्रामीण भागातील अनेक युवकांमध्ये क्रीडा क्षेत्रात पुढे जाण्याची क्षमता असते; मात्र योग्य सुविधा आणि सरावासाठी जागेअभावी त्यांच्या गुणवत्तेला अपेक्षित संधी मिळत नाही.

ही उणीव भरून काढण्यासाठी क्रीडांगण महत्त्वाची भूमिका बजावणार आहे.मैदानाच्या माध्यमातून तरुणाईला नवी ऊर्जा मिळण्याबरोबरच आरोग्य, शिस्त, संघभावना आणि नेतृत्वगुण विकसित होण्यास मदत होणार आहे. गावातील युवकांनी या सुविधेचा सकारात्मक वापर करून क्रीडा क्षेत्रात शिवण खुर्दचे नाव उज्ज्वल करावे, अशी अपेक्षा यावेळी व्यक्त करण्यात आली.

शहीद भगतसिंग यांच्या जयंतीचे औचित्य साधून साकारण्यात आलेले हे क्रीडांगण गावातील तरुणाईसाठी भविष्यात नवीन खेळाडू घडविणारे केंद्र ठरेल, असा विश्वास ग्रामस्थांनी व्यक्त केला.“भगतसिंगांच्या विचारांचा वारसा जपत गावाच्या विकासासाठी आणि उज्ज्वल भविष्यासाठी एकत्रितपणे कार्य करूया,” असा संदेश या उपक्रमातून देण्यात आला.