आंतरराष्ट्रीय युवा दिनानिमित्त मूर्तिजापुरात ‘रेड रन मॅरेथॉन २०२६’आरोग्यदायी जीवनशैली आणि जनजागृतीचा संदेश देण्यासाठी युवकांचा सहभाग

मूर्तिजापूर : आंतरराष्ट्रीय युवा दिनानिमित्त युवा शक्तीला सकारात्मक दिशा देण्यासोबतच आरोग्यदायी जीवनशैलीचा संदेश जनतेपर्यंत पोहोचविण्यासाठी मूर्तिजापुरात ‘रेड रन मॅरेथॉन २०२६’चे आयोजन करण्यात आले आहे.

‘आरोग्यासाठी धावा, जनजागृतीसाठी धावा, उज्ज्वल भविष्यासाठी धावा’ या संदेशासह ही मॅरेथॉन आयोजित करण्यात आली आहे.राष्ट्रीय आरोग्य अभियान, जिल्हा शल्य चिकित्सक कार्यालय, अकोला आणि तालुका क्रीडा अधिकारी, मूर्तिजापूर यांच्या संयुक्त विद्यमाने या उपक्रमाचे आयोजन करण्यात आले आहे.

युवकांमध्ये आरोग्य, व्यायाम आणि सामाजिक जनजागृतीबाबत सकारात्मक वातावरण निर्माण करणे हा या उपक्रमाचा मुख्य उद्देश आहे.मॅरेथॉनची सुरुवात श्री छत्रपती शिवाजी महाराज चौक, मूर्तिजापूर येथून होणार असून बुधवारी सकाळी ६.३० वाजता कार्यक्रमाचे आयोजन करण्यात आले आहे.

या उपक्रमात युवकांसह नागरिकांनी मोठ्या संख्येने सहभागी होऊन आंतरराष्ट्रीय युवा दिन उत्साहात साजरा करावा, असे आवाहन आयोजकांकडून करण्यात आले आहे.आजच्या धावपळीच्या जीवनशैलीत व्यायाम आणि आरोग्याकडे दुर्लक्ष होत असताना, अशा उपक्रमातून ‘फिट युवा, सशक्त समाज आणि उज्ज्वल भविष्य’ हा संदेश देण्याचा प्रयत्न केला जात आहे.

नागरिकांची उपस्थिती आणि सहभाग हीच या उपक्रमासाठी प्रेरणा ठरणार असल्याचे आयोजकांनी म्हटले आहे.