पोलीस निरीक्षक धर्मेंद्र जोशी यांचे हेल्मेटचे आवाहन; मग विना हेल्मेट पोलिसांवर कारवाई कधी?

राज्यात हेल्मेट सक्तीची अंमलबजावणी सुरू होताच अकोला जिल्ह्यातही वाहतूक पोलिसांनी धडक कारवाई सुरू केली आहे. विना हेल्मेट दुचाकी चालविणाऱ्या नागरिकांकडून दंड वसूल केला जात आहे. मात्र, याच दरम्यान मूर्तिजापूर शहरात काही पोलीस कर्मचारी हेल्मेटशिवाय दुचाकी चालवत असल्याचे दृश्य पाहायला मिळाल्याचा दावा नागरिक करत आहेत.

त्यामुळे पोलिसांच्या कारवाईवरच प्रश्नचिन्ह निर्माण झाले आहे.”कायदा फक्त सामान्य जनतेसाठीच आहे का?” हा प्रश्न आता उघडपणे विचारला जात आहे. नागरिकांकडून नियमभंग झाला तर तत्काळ दंड, पण नियम मोडणाऱ्या पोलीस कर्मचाऱ्यांवर कोण कारवाई करणार? असा संतप्त सवाल उपस्थित होत आहे.पोलीस निरीक्षक धर्मेंद्र जोशी यांनी हेल्मेट वापरण्याचे आवाहन केले असले, तरी प्रत्यक्षात काही पोलीस कर्मचारीच नियमांचे पालन करत नसतील, तर जनतेसमोर चुकीचा संदेश जात असल्याची भावना व्यक्त होत आहे.

कायद्याचा धाक दाखविण्यापूर्वी कायद्याचे पालन स्वतः करणे हीच खरी जबाबदारी आहे. अन्यथा हेल्मेट सक्ती ही केवळ दंड वसुलीची मोहीम असल्याची टीका अधिक तीव्र होऊ शकते.

आता नागरिकांचे लक्ष एका प्रश्नाकडे लागले आहे—“विना हेल्मेट आढळणाऱ्या पोलीस कर्मचाऱ्यांवरही दंडात्मक कारवाई होणार का, की त्यांना नियमांतून सूट आहे?”

फोटो – AI GENRATED