अकोला जिल्ह्यात पोलिसांचा धडाका : घरफोडीचा छडा, अल्पवयीन मुलगी सुरक्षित; जुगार अड्ड्यावर कारवाई

एकाच दिवशी तीन मोठ्या कारवायांनी अकोला पोलिसांची कार्यक्षमता पुन्हा सिद्ध

अकोला जिल्हा पोलिसांनी १८ जून रोजी विविध ठिकाणी केलेल्या प्रभावी कारवायांमुळे कायदा व सुव्यवस्था राखण्याबाबतची आपली बांधिलकी पुन्हा एकदा अधोरेखित केली आहे. घरफोडीचा गुन्हा उघडकीस आणत लाखो रुपयांचा मुद्देमाल जप्त करणे, डायल 112 च्या मदतीने अल्पवयीन मुलीला सुरक्षितपणे कुटुंबियांच्या स्वाधीन करणे आणि जुगार अड्ड्यावर धडक कारवाई करत आठ जणांना जेरबंद करणे अशा तीन महत्त्वाच्या कारवाया अकोला पोलिसांनी यशस्वीपणे पार पाडल्या.

अकोलखेड घरफोडीचा छडा; ४.२० लाखांचा मुद्देमाल जप्त

अकोट तालुक्यातील अकोलखेड येथे १० जून रोजी देवानंद मधुकर फरकाडे यांच्या बंद घरात घरफोडी करून सोन्या-चांदीचे दागिने चोरी करण्यात आले होते. अज्ञात चोरट्याने घराच्या खिडक्या, दरवाजे व कपाट फोडून मौल्यवान दागिने लंपास केले होते.

या प्रकरणी अकोट ग्रामीण पोलीस ठाण्यात गुन्हा दाखल झाल्यानंतर स्थानिक गुन्हे शाखेने तपासाची चक्रे वेगाने फिरवली. गुप्त माहितीच्या आधारे रवी उर्फ नारायण रामदास डाबेराव (वय ३६, रा. चोहट्टा बाजार) याला ताब्यात घेण्यात आले. चौकशीत आरोपीने गुन्ह्याची कबुली दिली.

त्याच्याकडून चोरीतील दागिने वितळवून तयार करण्यात आलेली २६.२४० ग्रॅम सोन्याची लगड (किंमत ४ लाख ४ हजार रुपये) आणि ६४ ग्रॅम वजनाचा चांदीचा गोळा (किंमत १६ हजार ६०० रुपये) असा एकूण ४ लाख २० हजार ६०० रुपयांचा मुद्देमाल जप्त करण्यात आला.

डायल 112 चा तत्काळ प्रतिसाद; पुण्यातील अल्पवयीन मुलगी सुरक्षित

अकोला पोलीस दलाच्या डायल 112 सेवेने आणखी एक संवेदनशील कामगिरी बजावत पुण्यातील एका अल्पवयीन मुलीला सुरक्षितपणे तिच्या आईच्या स्वाधीन केले.

१६ जून रोजी वाशीम बायपास परिसरात एक अल्पवयीन मुलगी संशयास्पद अवस्थेत फिरत असल्याची माहिती डायल 112 वर प्राप्त झाली. बीट मोबाईलवरील पोलीस कर्मचारी तातडीने घटनास्थळी पोहोचले. मुलगी घाबरलेल्या अवस्थेत आढळून आली.

चौकशीत तिचे नाव कु. संजना अंबादास माने (रा. हिंजवडी, पुणे) असल्याचे समोर आले. पुढील तपासानंतर तिच्या आई सारिका माने यांच्याशी संपर्क साधण्यात आला. आवश्यक खातरजमा करून मुलीला सुरक्षितपणे तिच्या आईच्या ताब्यात देण्यात आले.

या संवेदनशील कामगिरीमुळे अकोला पोलिसांच्या तत्परतेचे आणि नागरिकाभिमुख भूमिकेचे पुन्हा एकदा दर्शन घडले.

‘ऑपरेशन प्रहार’ अंतर्गत पिंजर येथे जुगार अड्ड्यावर धाड

अवैध धंद्यांविरोधात सुरू असलेल्या ‘ऑपरेशन प्रहार’ मोहिमेअंतर्गत पिंजर पोलिसांनी मोठी कारवाई करत जुगार अड्डा उद्ध्वस्त केला.

१७ जून रोजी गुप्त माहितीच्या आधारे पिंजर-कारंजा टी-पॉइंट परिसरातील शेतशिवारात छापा टाकण्यात आला. या कारवाईत आठ जणांना रंगेहात पकडण्यात आले.

आरोपींकडून १४ हजार ८०० रुपये रोख रक्कम, तसेच पल्सर, हिरो होंडा आणि टीव्हीएस ज्युपिटर अशा वाहनांसह एकूण २ लाख ४ हजार ८०० रुपयांचा मुद्देमाल जप्त करण्यात आला. सर्व आरोपींविरुद्ध महाराष्ट्र जुगार अधिनियम कलम १२ (अ) अन्वये गुन्हा दाखल करण्यात आला आहे.

अर्चित चांडक यांच्या नेतृत्वाखाली प्रभावी कारवायाया तिन्ही कारवाया

पोलीस अधीक्षक अर्चित चांडक, अपर पोलीस अधीक्षक बी. चंद्रकांत रेड्डी आणि संबंधित विभागीय अधिकाऱ्यांच्या मार्गदर्शनाखाली पार पडल्या. स्थानिक गुन्हे शाखा, जुने शहर पोलीस स्टेशन आणि पिंजर पोलीस स्टेशनच्या अधिकारी व कर्मचाऱ्यांनी समन्वयाने काम करत या यशस्वी कारवाया घडवून आणल्या.

अकोला पोलीस दलाने पुन्हा एकदा स्पष्ट केले आहे की, गुन्हेगारांवर कठोर कारवाई आणि नागरिकांच्या सुरक्षेसाठी तात्काळ मदत हीच त्यांची सर्वोच्च प्राथमिकता असून “ऑपरेशन प्रहार” आणि डायल 112 सारख्या उपक्रमांद्वारे ही मोहीम अधिक प्रभावीपणे सुरू राहणार आहे.