माणुसकीचा झरा: पाणेरी उपक्रमाने तहानलेल्या नागरिकांना आधार

मुर्तिजापूर: उन्हाळ्याच्या तीव्र उष्णतेत सर्वसामान्य नागरिकांना दिलासा देणारा एक सामाजिक उपक्रम शासकीय उपजिल्हा रुग्णालयासमोर राबवण्यात आला. कै. मारोतीअप्पा पिंपळे यांच्या स्मृती प्रित्यर्थ उभारण्यात आलेल्या पाणेरीचे उद्घाटन आमदार हरिष पिंपळे यांच्या हस्ते संपन्न झाले. या उपक्रमासाठी शिवभोजन संचालक विष्णु लोढम यांनी पुढाकार घेतला.

रुग्णालय परिसरात दररोज शेकडो रुग्ण व त्यांच्या नातेवाईकांची वर्दळ असते. उन्हाच्या कडाक्यात पिण्याच्या पाण्याची मोठी अडचण निर्माण होते. याच पार्श्वभूमीवर उभारलेली ही पाणेरी नागरिकांसाठी दिलासा ठरत आहे. येणाऱ्या-जाणाऱ्यांना स्वच्छ व थंड पिण्याचे पाणी उपलब्ध करून देण्याचा हा प्रयत्न समाजातील सेवाभाव अधोरेखित करणारा ठरला आहे.

यावेळी आमदार हरिष पिंपळे यांनी अशा सामाजिक उपक्रमांचे कौतुक करत, “समाजाच्या गरजा ओळखून केलेले हे कार्य अत्यंत महत्त्वाचे आहे. अशा उपक्रमांमुळे माणुसकी जिवंत राहते,” असे मत व्यक्त केले.

शिवभोजन संचालक विष्णु लोढम यांनी सांगितले की, कै. मारोतीअप्पा पिंपळे यांच्या स्मृती जपण्यासोबतच समाजाला प्रत्यक्ष मदत होईल, या उद्देशाने हा उपक्रम हाती घेण्यात आला आहे.

पुढील काळातही अशा सेवाभावी उपक्रमांची परंपरा कायम ठेवण्याचा मानस त्यांनी व्यक्त केला.उन्हाळ्यात शरीरातील पाण्याची गरज वाढत असताना सार्वजनिक ठिकाणी पिण्याच्या पाण्याची सुविधा उपलब्ध करून देणे ही मोठी सामाजिक जबाबदारी आहे.

अशा पाणेरी उपक्रमांमुळे केवळ तहान भागत नाही, तर समाजात परस्पर सहकार्य आणि माणुसकीची भावना अधिक दृढ होते.