रोहणा बॅरेज प्रकल्पग्रस्त शेतकऱ्यांना ५ कोटींच्या सानुग्रह अनुदानाचे धनादेश वितरित

मूर्तिजापूर : रोहणा बॅरेज प्रकल्पातील सरळ खरेदीधारक शेतकऱ्यांना विशेष सानुग्रह अनुदानाचा लाभ मिळावा, यासाठी बळीराजा प्रकल्पग्रस्त संघर्ष संघटनेच्या वतीने करण्यात आलेल्या मागणीला यश आले आहे. महाराष्ट्र शासनाच्या जलसंपदा विभागांतर्गत विदर्भातील सरळ खरेदीधारक शेतकऱ्यांसाठी मंजूर करण्यात आलेल्या ८३१ कोटी रुपयांच्या विशेष सानुग्रह अनुदान निधीतून रोहणा बॅरेज प्रकल्पातील शेतकऱ्यांसाठी ५ कोटी रुपयांचे अनुदान मंजूर करण्यात आले.

“स्वर्गीय आमदार बी.टी. देशमुख आणि आमदार तुकारामजी बिडकरांनी विदर्भ विकासाचा वटवृक्ष लावला; त्या वारशाला जपत आमदार हरीश पिंपळे विकासाची नवी पाने फुलवत आहेत.”

या अनुदानाच्या धनादेश वितरण सोहळ्याचे आयोजन शनिवारी (८ ऑगस्ट) दुर्गामाता मंदिर, लक्कडगंज, मूर्तिजापूर येथे करण्यात आले. आमदार हरिषभाऊ पिंपळे यांच्या हस्ते लाभार्थी शेतकऱ्यांना धनादेशांचे वितरण करण्यात आले. कार्यक्रमाला बळीराजा प्रकल्पग्रस्त संघर्ष संघटनेचे संस्थापक अध्यक्ष मनोजभाऊ चव्हाण यांची प्रमुख उपस्थिती होती.

यावेळी नगराध्यक्ष हर्षलभाऊ साबळे, भाजपा मूर्तिजापूर ग्रामीण मंडळ अध्यक्ष नंदकिशोर राऊत, भाजपा कुरणखेड मंडळ अध्यक्ष प्रशांत ठाकरे, नगरसेवक भरतभाऊ जेठवानी, राम जोशी, गजाननभाऊ नाकट, यांच्यासह जलसंपदा विभागाचे अधिकारी, संघटनेचे व पक्षाचे पदाधिकारी, प्रकल्पग्रस्त शेतकरी व नागरिक मोठ्या संख्येने उपस्थित होते.

प्रकल्पग्रस्त शेतकऱ्यांच्या न्याय्य मागण्यांसाठी संघटनेचा संघर्ष सुरूच राहणार असून, शासनाकडून मिळालेला हा निधी शेतकऱ्यांसाठी महत्त्वाचा दिलासा असल्याचे मनोजभाऊ चव्हाण यांनी सांगितले. शासनाच्या निर्णयामुळे रोहणा बॅरेज प्रकल्पातील सरळ खरेदीधारक शेतकऱ्यांमध्ये समाधानाचे वातावरण निर्माण झाले.

कार्यक्रम उत्साहपूर्ण वातावरणात पार पडला. उपस्थित मान्यवरांनी प्रकल्पग्रस्त शेतकऱ्यांच्या प्रश्नांवर पुढील काळातही सकारात्मक पाठपुरावा करण्याची ग्वाही दिली.

आमदार हरिष पिंपळे यांच्या हस्ते धनादेश वितरण; बळीराजा प्रकल्पग्रस्त संघर्ष संघटनेच्या पाठपुराव्याला यश