मुर्तिजापूरच्या सुपुत्राची जागतिक भरारीIA&AS अधिकारी आदित्य राजेंद्र भोजगढिया यांची WTO मधील भारताच्या कायमस्वरूपी मिशनमध्ये प्रथम सचिवपदी नियुक्ती

मुर्तिजापूर | प्रतिनिधी

मुर्तिजापूरचे सुपुत्र तथा भारतीय लेखापरीक्षण व लेखा सेवा (Indian Audit & Accounts Service – IA&AS) अधिकारी आदित्य राजेंद्र भोजगढिया यांची स्वित्झर्लंडमधील जिनिव्हा येथे जागतिक व्यापार संघटना (World Trade Organization – WTO) मधील भारताच्या कायमस्वरूपी मिशनमध्ये प्रथम सचिव (First Secretary) म्हणून तीन वर्षांच्या कालावधीसाठी नियुक्ती करण्यात आली आहे.

केंद्र सरकारच्या Appointments Committee of the Cabinet (ACC) ने या नियुक्तीस मंजुरी दिली असून, ही नियुक्ती भारताच्या आंतरराष्ट्रीय व्यापार धोरणातील महत्त्वाच्या जबाबदाऱ्यांपैकी एक मानली जाते.

आदित्य भोजगढिया हे मुर्तिजापूरचे ज्येष्ठ वृत्तपत्र व्यवसायी स्वर्गीय नंदलाल सागरमल अग्रवाल यांचे नातू तसेच राजेंद्र अग्रवाल यांचे सुपुत्र आहेत.

त्यांच्या या नियुक्तीमुळे मुर्तिजापूरसह संपूर्ण विदर्भाच्या शिरपेचात मानाचा तुरा खोवला गेला आहे.भारतीय लेखापरीक्षण व लेखा सेवेमधील अधिकारी म्हणून कार्यरत असलेल्या आदित्य भोजगढिया यांनी आपल्या प्रशासकीय कारकिर्दीत विविध महत्त्वाच्या जबाबदाऱ्या यशस्वीपणे पार पाडल्या आहेत.

त्यांच्या अनुभवाची दखल घेत केंद्र सरकारने त्यांची WTO मधील भारताच्या कायमस्वरूपी मिशनमध्ये नियुक्ती केली आहे.जागतिक व्यापार संघटना (WTO) ही आंतरराष्ट्रीय व्यापाराचे नियम, बहुपक्षीय व्यापार करार, सदस्य राष्ट्रांमधील व्यापारविषयक वाद आणि जागतिक व्यापार धोरण यावर काम करणारी प्रमुख आंतरराष्ट्रीय संस्था आहे.

भारताच्या कायमस्वरूपी मिशनमध्ये प्रथम सचिव म्हणून आदित्य भोजगढिया भारताच्या व्यापारविषयक हितसंबंधांचे प्रतिनिधित्व करतील तसेच विविध आंतरराष्ट्रीय चर्चांमध्ये आणि धोरणात्मक बैठकींमध्ये भारताची भूमिका प्रभावीपणे मांडतील.

या नियुक्तीबाबत केंद्र सरकारने अधिकृत आदेश जारी केले असून, ते लवकरच जिनिव्हा येथे आपल्या नव्या पदाचा कार्यभार स्वीकारणार आहेत.

या नियुक्तीनंतर मुर्तिजापूर शहरात आनंदाचे वातावरण असून, विविध सामाजिक, शैक्षणिक, व्यापारी आणि व्यावसायिक क्षेत्रातील मान्यवरांनी आदित्य भोजगढिया यांचे अभिनंदन केले आहे.

स्थानिक नागरिकांनी त्यांच्या यशाचा गौरव करत, ही नियुक्ती शहरातील तरुणांसाठी प्रेरणादायी असल्याची भावना व्यक्त केली आहे.मुर्तिजापूरने विविध क्षेत्रांत देशाला अनेक गुणवंत अधिकारी, उद्योजक आणि व्यावसायिक दिले आहेत.

त्या परंपरेत आदित्य भोजगढिया यांच्या या प्रतिष्ठित नियुक्तीची नोंद निश्चितच अभिमानास्पद ठरणारी असून, जागतिक स्तरावर भारताचे प्रतिनिधित्व करण्याची ही संधी त्यांच्या कारकिर्दीतील महत्त्वाचा टप्पा मानली जात आहे.