म्हैसांग गावात समस्या की समस्यांमध्येच गाव?

घरकुलातील कथित गैरव्यवहारापासून गढूळ पाण्यापर्यंत; स्वच्छतेचा प्रश्नही ऐरणीवर

म्हैसांग : अकोला जिल्ह्यातील या गावाच्या विकासाची चर्चा होत असताना म्हैसांग गाव मात्र सध्या विविध मूलभूत समस्यांच्या विळख्यात सापडल्याचे चित्र आहे. घरकुल योजना, स्वच्छता, नाल्यांची साफसफाई आणि पिण्याच्या पाण्याचा प्रश्न यामुळे ग्रामस्थ त्रस्त झाले असून, प्रशासनाच्या कारभारावर प्रश्नचिन्ह उपस्थित केले जात आहे.गावातील घरकुल योजना हा सध्या सर्वाधिक चर्चेचा विषय ठरला आहे.

पात्र लाभार्थ्यांना घरकुल योजनेचा लाभ मिळाल्याचे सांगितले जात असले तरी, या योजनेच्या अंमलबजावणीत गैरव्यवहार व भ्रष्टाचार झाल्याचा आरोप काही ग्रामस्थांकडून केला जात आहे.

प्रत्यक्षात पात्रता, मंजूर निधी, लाभार्थ्यांची यादी आणि बांधकामाची स्थिती याची पारदर्शक चौकशी झाल्यास सत्य समोर येऊ शकते, अशी ग्रामस्थांची भूमिका आहे.

नाल्यांची अवस्था बिकट

दुसरीकडे गावातील स्वच्छतेचा प्रश्नही गंभीर बनला आहे. अनेक दिवसांपासून नाल्यांची साफसफाई झालेली नसल्याने ठिकठिकाणी घाण व साचलेले पाणी दिसून येत असल्याची ग्रामस्थांची तक्रार आहे. त्यामुळे दुर्गंधी तसेच आरोग्याचा प्रश्न निर्माण होण्याची शक्यता व्यक्त केली जात आहे.

गढूळ पाणी; ग्रामस्थांच्या आरोग्याचा प्रश्न

गावातील पिण्याच्या पाण्याबाबतही नागरिकांकडून नाराजी व्यक्त होत आहे. पिण्याचे पाणी गढूळ येत असल्याच्या तक्रारी असून, अशा परिस्थितीत नागरिकांना दूषित पाणी पिण्याची वेळ येत असल्याचा आरोप आहे. पाणीपुरवठा व्यवस्थेची तातडीने तपासणी करून पाण्याची गुणवत्ता तपासावी, अशी मागणी ग्रामस्थांकडून होत आहे.

घरकुलाचा प्रश्न, अस्वच्छ नाल्या आणि गढूळ पाणी—म्हैसांगच्या विकासाच्या दाव्यांसमोर अनेक प्रश्न उभे ठाकले आहेत. प्रशासन आणि ग्रामपंचायतीने या समस्यांकडे गांभीर्याने पाहून प्रत्यक्ष पाहणी करावी आणि संबंधित तक्रारींची चौकशी करून दोषींवर कारवाई करावी, अशी अपेक्षा ग्रामस्थ व्यक्त करीत आहेत.

आता प्रश्न एकच—म्हैसांग गाव समस्यांमधून बाहेर कधी पडणार?