मतदारयादीच्या विशेष पडताळणी (SIR)मुळे २१ वर्षांपासून फरार आरोपी जेरबंद

मुंबई | प्रतिनिधी | अमर तळोकार

महाराष्ट्रात सुरू असलेल्या विशेष मतदार यादी पुनर्निरीक्षण (Special Intensive Revision – SIR) मोहिमेमुळे तब्बल २१ वर्षांपासून फरार असलेल्या आरोपीला अटक करण्यात मुंबई पोलिसांना मोठे यश मिळाले आहे.

सुमारे दोन दशकांपासून पोलिसांना चकवा देणारा नाशिकमधील व्यावसायिक अवधूत चाफेकर (वय ६५) अखेर मुंबई पोलिसांच्या जाळ्यात अडकला.पोलिसांनी दिलेल्या माहितीनुसार, २००५ मध्ये सुमारे ९ लाख रुपयांच्या फसवणुकीच्या प्रकरणात चाफेकर याच्याविरुद्ध गुन्हा दाखल झाला होता. या प्रकरणी न्यायालयाने त्याच्याविरुद्ध अटक वॉरंट जारी केले होते.

मात्र, त्यानंतर तो सतत फरार राहून पोलिसांना चकवा देत होता.तपासादरम्यान समोर आलेल्या माहितीनुसार, चाफेकर गेल्या २१ वर्षांपासून नाशिकमध्ये आपली खरी ओळख लपवून राहत होता. संशय येऊ नये म्हणून त्याने स्वतःच्या नावावर कधीही मोबाईल कनेक्शन घेतले नाही.

तसेच, इतरांच्या ओळखपत्रांचा वापर करून तो आपली ओळख लपवत होता. या काळात त्याने नाशिकमध्ये इलेक्ट्रिकल मॅन्युफॅक्चरिंगचा व्यवसायही उभा केला होता.

दरम्यान, महाराष्ट्रात निवडणूक आयोगाकडून सुरू असलेल्या विशेष मतदार यादी पुनर्निरीक्षण (SIR) मोहिमेदरम्यान मतदारांची घरोघरी जाऊन सखोल पडताळणी केली जात आहे.

२००२ नंतर प्रथमच राज्यात एवढ्या मोठ्या प्रमाणावर ही मोहीम राबविण्यात येत आहे.याच मोहिमेदरम्यान चाफेकरने जुन्या मतदार यादीतील आपली माहिती अद्ययावत करण्यासाठी पडताळणी प्रक्रिया पूर्ण केली. मुंबईच्या बीकेसी पोलीस ठाण्याने निवडणूक अधिकाऱ्यांशी समन्वय साधून त्याच्या हालचालींवर लक्ष ठेवले.

चाफेकर एका हॉटेलमध्ये चेक-इन करताच पोलिसांनी तत्काळ कारवाई करून त्याला ताब्यात घेतले.अटकेनंतर चाफेकर याला पुढील कायदेशीर कारवाईसाठी न्यायालयात हजर करण्यात आले असून, या प्रकरणाचा पुढील तपास सुरू असल्याची माहिती पोलिसांनी दिली आहे.

विशेष म्हणजे, मतदारयादीच्या सखोल पडताळणी मोहिमेमुळे अनेक वर्षांपासून फरार असलेला आरोपी कायद्याच्या कचाट्यात सापडल्याने या मोहिमेचे महत्त्व पुन्हा अधोरेखित झाले आहे.