मुर्तिजापूरात बंदी असलेली स्वीट सुपारी खुलेआम विक्रीला?; लहान मुलांच्या आरोग्याशी खेळ, प्रशासन कारवाई करणार का?

मुर्तिजापूर शहरात लहान मुलांना आकर्षित करणारी स्वीट सुपारीची पाकिटे खुलेआम विक्री होत असल्याचे चित्र समोर येत असून, यामुळे शहरात खळबळ उडाली आहे. शाळांच्या परिसरात, पानटपऱ्या तसेच किराणा दुकानांमध्ये अवघ्या ₹१ मध्ये मिळणारी स्वीट सुपारी सहज उपलब्ध होत असल्याने पालकांमध्ये चिंतेचे वातावरण आहे.

राज्यात सुपारीजन्य पदार्थांच्या विक्रीबाबत विविध नियम लागू असताना, त्यांची अंमलबजावणी मुर्तिजापूरात होत आहे का, असा प्रश्न नागरिकांकडून उपस्थित केला जात आहे.

विशेष म्हणजे आकर्षक पॅकिंगमुळे लहान मुले या पदार्थांकडे सहज आकर्षित होत असल्याचे दिसून येत आहे.आरोग्य तज्ज्ञांच्या मते, सुपारीचे सेवन आरोग्यासाठी घातक ठरू शकते.

त्यामुळे अशा उत्पादनांची विक्री आणि त्यावरील नियमांचे काटेकोर पालन होणे आवश्यक आहे. मात्र शहरात अनेक ठिकाणी अशा उत्पादनांची सर्रास विक्री होत असल्याने संबंधित यंत्रणांच्या कार्यपद्धतीवर प्रश्नचिन्ह निर्माण झाले आहे.

नागरिकांनी अन्न व औषध प्रशासन (FDA), अन्न सुरक्षा विभाग, पोलीस प्रशासन आणि नगर परिषद यांनी संयुक्त तपासणी करून नियमांचे उल्लंघन होत असल्यास संबंधित उत्पादक, वितरक व विक्रेत्यांवर कठोर कारवाई करावी, अशी मागणी केली आहे.

प्रश्न अनुत्तरितच…

शहरात लहान मुलांना सहज मिळणारी स्वीट सुपारी कोणाच्या आशीर्वादाने विकली जाते?

संबंधित विभाग नियमित तपासणी करतो का?

नियमांचे उल्लंघन करणाऱ्यांवर कठोर कारवाई होणार का?

लहान मुलांच्या आरोग्याशी खेळ करणाऱ्यांना पाठीशी घालणारे कोण?

आता या प्रकरणाची दखल घेऊन संबंधित विभाग कारवाई करणार की केवळ कागदोपत्रीच नियम राहणार, याकडे संपूर्ण शहराचे लक्ष लागले आहे.