चंद्रपूरमध्ये धक्कादायक उलगडा, “मुलीनेच दिलं वडिलांना विष; ३ वर्षांनी खुनाचा गुन्हा उघड”

चंद्रपूर, प्रतिनिधी :
चंद्रपूर जिल्ह्यातील एका धक्कादायक प्रकरणाचा तब्बल तीन वर्षांनंतर उलगडा झाला आहे. वडिलांच्या मृत्यूमागे कोणताही संशय नसताना आता त्याच मृत्यूचा गुन्हा खून असल्याचे स्पष्ट झाले असून, स्वतः मुलीनेच वडिलांना मिल्कशेकमधून विष देऊन ठार मारल्याची कबुली दिली आहे. या प्रकरणी पोलिसांनी आरोपी मुलगी आणि तिच्या पतीसह इतरांवर गुन्हा दाखल केला आहे.

काय आहे संपूर्ण प्रकरण?

आर्या बल्लावार (२२) हिने एप्रिल २०२३ मध्ये तिचे वडील जयंत बल्लावार, जे पोलिस खात्यात हेड कॉन्स्टेबल होते, यांना मिल्कशेकमधून विष देऊन मारल्याचा आरोप आहे. त्या वेळी अचानक प्रकृती बिघडून त्यांचा मृत्यू झाला होता. स्पष्ट कारण समोर न आल्याने त्या वेळी अपघाती मृत्यू (ADR) म्हणून नोंद करण्यात आली होती.

प्रेमसंबंधातून रचला कट

पोलिस तपासात उघड झाल्यानुसार, आर्या हिचे आशिष शेडमाके याच्यासोबत प्रेमसंबंध होते. मात्र, वडिलांचा या नात्याला तीव्र विरोध होता. यामुळे दोघांनी मिळून वडिलांचा खून करण्याचा कट रचला.
आशिषच्या मदतीने विष मिळवून आर्याने ते वडिलांच्या पेयात मिसळले आणि त्यांचा मृत्यू घडवून आणला.

३ वर्षांनी कसा झाला उलगडा?

या प्रकरणाला नाट्यमय वळण मिळाले ते स्वतः आरोपीच्या पतीमुळे.
आर्या आणि आशिष यांच्यात नंतर वाद निर्माण झाले. त्यानंतर संतप्त झालेल्या आशिषनेच पोलिसांकडे तक्रार दाखल केली आणि फोन संभाषणासह पुरावे सादर केले.

यावरून पोलिसांनी पुन्हा तपास सुरू केला असता आर्याने गुन्ह्याची कबुली दिली.

अनुकंपा नोकरीनंतर उघड झाले रहस्य

वडिलांच्या मृत्यूनंतर आर्याला २०२५ मध्ये अनुकंपा तत्त्वावर पोलिस दलात नोकरी मिळाली होती. ती सध्या रामनगर पोलीस ठाण्यात कार्यरत होती.

दरम्यान, या प्रकरणात आर्या, तिचा पती आशिष, तसेच विष मिळवून देणाऱ्या अन्य आरोपींविरुद्ध गुन्हा दाखल करण्यात आला असून सर्व आरोपी सध्या न्यायालयीन कोठडीत आहेत.

पोलिसांचा तपास सुरू

या प्रकरणात अधिक तपास सुरू असून, कटात सहभागी असलेल्या इतरांची भूमिकाही तपासली जात आहे. प्रेमसंबंधातील अडथळा दूर करण्यासाठी एवढं टोकाचं पाऊल उचलल्याने संपूर्ण जिल्ह्यात खळबळ उडाली आहे.