मुर्तिजापूरच्या राजकारणात अनुभवी चेहरा : भारत जेठवानी यांची स्वीकृत नगरसेवकपदी निवड

मुर्तिजापूर शहराच्या राजकारणात अनुभव, कार्यकुशलता आणि समाजाशी असलेली नाळ यांना नेहमीच महत्त्व राहिले आहे.

अशाच गुणांनी ओतप्रोत असलेले भारत अनिल कुमार जेठवानी यांची भारतीय जनता पक्षाने स्वीकृत नगरसेवक म्हणून केलेली निवड ही केवळ पदाची नियुक्ती नसून त्यांच्या दीर्घकालीन कार्याची पावती म्हणावी लागेल.

शैक्षणिकदृष्ट्या B.Sc. (कॉम्प्युटर) पदवीधर असलेले भारत जेठवानी हे आधुनिक शिक्षणासोबतच सामाजिक भान जपणारे नेतृत्व म्हणून ओळखले जातात.

सामाजिक कार्याची त्यांची वाटचाल दयारिझ बहुउद्देशीय संस्था, इतर बहुउद्देशीय संस्था तसेच विविध क्रीडा संघटनांच्या माध्यमातून सुरू असून या संस्थांद्वारे त्यांनी सातत्याने समाजसेवेचे कार्य केले आहे.

युवकांना क्रीडा, शिक्षण व संघटनात्मक कार्याशी जोडण्याचा त्यांचा प्रयत्न उल्लेखनीय आहे.

राजकीय प्रवासाकडे पाहता, २०११ साली काँग्रेस पक्षाकडून प्रथमच निवडणूक लढवून नगरसेवक म्हणून ते निवडून आले.

त्यानंतर २०११ ते २०१६ आणि पुन्हा २०१६ ते २०२१ या सलग दोन कार्यकाळात त्यांनी नगरसेवक म्हणून प्रभावी भूमिका बजावली.

या काळात त्यांनी मुर्तिजापूर नगरपरिषदेचे उपाध्यक्ष, शिक्षण सभापती, पाणीपुरवठा सभापती तसेच विरोधी पक्षनेते अशी महत्त्वाची पदे सांभाळली.

या सर्व जबाबदाऱ्यांमधून त्यांचा प्रशासकीय अनुभव, निर्णयक्षमता आणि नेतृत्वगुण ठळकपणे समोर आले.

नगरसेवक म्हणून काम करताना शहराच्या मूलभूत प्रश्नांपासून ते सार्वजनिक धार्मिक कार्यक्रमांपर्यंत त्यांनी नेहमीच सक्रिय सहभाग घेतला.

सामाजिक सलोखा, सर्वसमावेशक विकास आणि लोकाभिमुख निर्णयप्रक्रिया ही त्यांच्या कार्यशैलीची ओळख राहिली आहे.

कौशल्यविकासाला प्रोत्साहन देणारे समाजसेवक, उद्योजक वृत्तीचे नेतृत्व आणि प्रेमळ स्वभावामुळे युवकांचे आदर्श अशी त्यांची प्रतिमा शहरात निर्माण झाली आहे.

हीच पार्श्वभूमी लक्षात घेता, भारतीय जनता पक्षाने व आमदार हरीश पिंपळे यांनी दूरदृष्टी ठेवून पक्ष बळकटीकरणासाठी भारत अनिल कुमार जेठवानी यांची स्वीकृत नगरसेवक म्हणून निवड केली आहे.

अनुभव, सामाजिक स्वीकारार्हता आणि संघटनात्मक क्षमता यांचा योग्य उपयोग शहराच्या विकासासाठी होईल, अशी अपेक्षा नागरिकांमध्ये व्यक्त होत आहे.

एकूणच, ही निवड मुर्तिजापूरच्या राजकीय आणि सामाजिक जीवनात स्थैर्य व सकारात्मक दिशादर्शक ठरणारी ठरेल, यात शंका नाही.