पनवेल महानगरपालिका आणि सिडकोची संयुक्त तोडक कारवाई

एमजीएम हॉस्पीटल समोरील सर्व अतिक्रमणे जमीनदोस्त…

पनवेल प्रतिनिधी:(श्रीनाथ दत्तात्रेय लाड)-
कळंबोली जंक्शन सुधारणा प्रकल्प अंतर्गत मुंबईच्या दिशेने होणारी वाहतूक सुरळित होण्यासाठी एमजीएम हॉस्पीटल समोरील कॉरीडर उपायोगात आणण्यासाठी, पनवेल महानगरपालिका व सिडको प्राधिकरण यांच्या संयुक्त विद्यमाने आज दिनांक 05 मे रोजी मंगळवारी मोठी तोडक कारवाई करून हा परिसर अतिक्रमण मुक्त करण्यात आला.

या संयुक्तिक कारवाईवेळी पनवेल महानगरपालिका, सिडको प्रशासन, पोलिस प्रशासन यांचे मोठ्या प्रमाणावर मनुष्यबळ उपस्थित होते. जेसीबीच्या साह्याने करण्यात आलेल्या या तोडक कारवाईत एमजीएम रूग्णालयासमोरील वर्षानुवर्षे उभारलेली पक्की अतिक्रमणे जमीनदोस्त करण्यात आली.

आयुक्त मंगेश चितळे व अतिरिक्त आयुक्त महेशकुमार मेघमाळे यांच्या मार्गदर्शनाखाली करण्यात आलेल्या या कारवाईवेळी कारवाई सहायक आयुक्त तथा प्रभाग अधिकारी डॉ. रूपाली माने, अधिक्षक दशरथ भंडारी, उमेश मडवी, सिडको अधिकारी रावसाहेब देवकर, आणि टीम, पोलीस कर्मचारी हजर, पनवेल महानगरपालिका अतिक्रमण विभागाचे कर्मचारी उपस्थित होते.