बंद दरवाज्याआड सुरू होता घाणेरडा धंदा; खदान पोलिसांनी खेचले बाहेर : शहराच्या मध्यभागी सेक्स रॅकेट

अकोला, दि. २८ : २७ फेब्रुवारी २०२६ रोजी शहरातील खदान पोलीस स्टेशन हद्दीत सुरू असलेल्या अनैतिक देहव्यापाराच्या अड्ड्यावर पोलिसांनी अँटी ह्युमन ट्रॅफिकिंग युनिट (AHTU)च्या मदतीने टाकलेल्या नियोजनबद्ध छाप्यात धक्कादायक वास्तव समोर आले. पैशांचे आमिष दाखवून बाहेरून महिलांना बोलावून देहव्यापार करवून घेतला जात असल्याचा प्रकार उघडकीस आल्याने शहरात एकच खळबळ उडाली आहे. या कारवाईत मुख्य सूत्रधार असलेल्या महिलेविरुद्ध गुन्हा दाखल करण्यात आला असून रोख रक्कम, मोबाईल व इतर साहित्य असा ६१ हजार ५० रुपयांचा मुद्देमाल जप्त करण्यात आला आहे.

news photo AI gentrated

गुप्त माहितीवरून आखला सापळा

खदान पोलिसांना मिळालेल्या गुप्त माहितीनुसार, परिसरात एक महिला आर्थिक फायद्यासाठी बाहेरील मुली व महिलांना पैशांचे आमिष दाखवून देहव्यापारासाठी प्रवृत्त करत होती. ग्राहकांकडून पैसे घेऊन या महिलांकडून अनैतिक कृत्य करवून घेतले जात असल्याची खात्रीशीर माहिती मिळताच वरिष्ठ अधिकाऱ्यांच्या मार्गदर्शनाखाली विशेष पथक तयार करण्यात आले. बनावट ग्राहक (पंटर) पाठवून संपूर्ण व्यवहाराची शहानिशा करण्यात आली आणि पंचांसमक्ष छापा टाकण्यात आला.

छाप्यात रंगेहाथ कारवाई

पोलिसांनी कारवाई केली असता आरोपी महिला दोन महिलांकडून देहव्यापार करून घेत असल्याचे स्पष्ट झाले. घटनास्थळावरून व्यवहारातील रोख रक्कम, सिलबंद कंडोम पाकिटे व मोबाईल जप्त करण्यात आले. आरोपीविरुद्ध अनैतिक व्यापार प्रतिबंधक कायदा १९५६ चे कलम ३, ४ व ५ अन्वये गुन्हा दाखल करण्यात आला असून या प्रकरणातील इतर दुव्यांचा शोध घेण्याचे काम सुरू आहे.

संघटित जाळ्याचा संशय

प्राथमिक तपासात हा प्रकार केवळ एका ठिकाणापुरता मर्यादित नसून त्यामागे दलाल, ग्राहक व बाहेरून महिलांना पुरवठा करणारे मध्यस्थ यांचे जाळे असण्याची शक्यता पोलिसांनी व्यक्त केली आहे. मोबाईलमधील कॉल डिटेल्स, आर्थिक व्यवहार व संपर्कांचे विश्लेषण करून या रॅकेटचा विस्तार किती आहे याचा तपास केला जाणार आहे.

महिलांच्या शोषणाचा गंभीर मुद्दा

या कारवाईमुळे केवळ अनैतिक व्यवसाय उघड झाला नसून आर्थिक व सामाजिक अडचणीत असलेल्या महिलांचे कशाप्रकारे शोषण केले जाते, हा गंभीर प्रश्नही पुन्हा ऐरणीवर आला आहे. पैशांचे आमिष, फसवणूक किंवा जबरदस्तीच्या माध्यमातून महिलांना या दलदलीत ढकलले जात असल्याचे अनेक प्रकरणांतून समोर आले आहे. त्यामुळे अशा कारवाया केवळ गुन्हेगारीविरोधात नसून मानव तस्करी रोखण्याच्या दृष्टीनेही महत्त्वाच्या ठरत आहेत.

परिसरात वाढत्या अनैतिक धंद्यांवर पोलिसांचे लक्ष

शहरातील काही भागांत भाड्याच्या खोल्या, लॉज किंवा निवासी इमारतींचा वापर करून गुप्तपणे देहव्यापार चालवला जात असल्याच्या तक्रारी वाढत आहेत. या पार्श्वभूमीवर पोलिसांनी माहिती संकलन वाढवले असून नागरिकांनीही संशयास्पद हालचालींची माहिती द्यावी, असे आवाहन करण्यात आले आहे.

वरिष्ठांच्या मार्गदर्शनाखाली यशस्वी मोहिम

ही कारवाई पोलीस अधीक्षक अचिंत चांडक, अपर पोलीस अधीक्षक चंद्रकांत रेड्डी, उपविभागीय पोलीस अधिकारी सुदर्शन पाटील, सहायक पोलीस अधीक्षक ईशानी आनंद यांच्या मार्गदर्शनाखाली पार पडली. खदान पोलीस स्टेशनचे पोलीस निरीक्षक मनोज केदारे यांच्या नेतृत्वात मपोउपनि मयुरी सावंत, पोहेकॉ संतोष गावंडे, पो.कॉ. स्वप्नील वानखडे, मंगेश खेडकर, मपो.कॉ. उज्वला मडावी, महिला कर्मचारी तसेच AHTUच्या एपीआय कविता फुसे व त्यांच्या पथकाने ही कारवाई यशस्वी केली.

पुढील तपास महत्त्वाचा

या प्रकरणात आणखी कोणाचा सहभाग आहे का, बाहेरील महिलांना कोठून आणले जात होते, आर्थिक व्यवहाराची साखळी किती मोठी आहे, याचा सखोल तपास सुरू आहे. शहरातील अशा अनैतिक धंद्यांवर पोलिसांचा करडा नजर ठेवण्यात येणार असल्याचा इशारा देण्यात आला आहे.